近兩年區議會頻頻補選，除咗今個月下旬舉行嘅南區海怡西補選外，下月就輪到離島區東涌北選區補選喇。東涌北選區補選戰之中，據聞除咗半年前開始落區嘅泛民主派年輕大狀余俊翔積極考慮參選外，建制派方面可能會派服務過離島區嘅前委任區議員、香港資助小學校長會主席梁兆棠鬥過。不過，聽聞就算呢區本屬建制派陣地，建制派今次都未必可以穩勝，因為一切都同佢哋嘅形象有關喎。
其實今次係因為原東涌北區議員林悅偽造文件，向銀行申請按揭貸款，被判入獄二十一個月，緩刑兩年，再被區議會按《區議會條例》取消議員資格，需要就議席補選。所以有建制派中人話，其實會擔心佢哋喺當區居民心中嘅形象有影響，再加上東涌北區中產人士較多，加上梁兆棠又未曾參選，所以預料雙方最多都係打五五波咋。至於中途仲會唔會有其他人士加入戰團？都依家都未知，話唔定可以冷手執個熱煎堆。