政情：八網難逃：網晒「人仔」 項明生代人歡喜

旅遊作家項明生（James）尋日喺社交網站晒一大疊一百元人民幣（圖），仲留言話：「大手筆，抽獎用現金，仲要用人民幣！」細心睇吓，個場合係合和實業周年晚宴，James同合和董事總經理胡文新好老友梗要去捧場啦，而疊銀紙就有成二千元人仔咁多，唔通James中大獎？James笑稱唔係，其實係當晚佢隔籬位嘅朋友抽中。佢仲話，人仔愈來愈貴，上星期佢上廣州洽談出版簡體字版旅遊書，一百元港紙只換到七十七元人仔，想當年港紙貴過人仔，一百元港紙可以換到一百二十元人仔，真係風水輪流轉。