政情:贊助長跑賽 冠名有「德」諗

信興集團副主席蒙德揚(David)一向熱衷跑馬拉松,尋日佢與任董事嘅家姐蒙倩兒出席傳媒聚會,見佢精神奕奕,原來佢呢頭跑完香港渣打馬拉松,轉頭又征戰日本東京馬拉松返港。既然David咁鍾意馬拉松,有冇諗過贊助香港馬拉松呢?David聽罷笑笑口話,如果田徑總會開放畀外界競投冠名贊助權,佢都有興趣。

其實渣打馬拉松係由田徑總會喺十七年前主辦,當時由渣打銀行冠名贊助,所以先至以銀行名命名,隨住參加人數漸增,帶起一陣城中運動風氣,於是活動愈打愈響,唔講仲以為賽事係渣打主辦添!話時話,點解十七年嚟賽事一直由渣打獨家贊助,唔係好似年初二、七一回歸放煙花慶祝咁,有多啲企業或機構冠名贊助呢?

至於負責集團投資業務嘅蒙倩兒就對近期急貶嘅人民幣好有興趣,打算出手買多啲人民幣,佢話香港有企業發行人民幣債券年息高達七厘,好過擺喺銀行只得兩厘幾息。有家姐咁穩陣幫公司投資,David咪有充足「水源」贊助有意義嘅運動囉!

第一手消息請下載on.cc東網iPhone/iPad/Android/Windows Phone Apps