政情：反公民提名 區會擺擂台
港府將於兩個多月後，完成二○一七年普選特首方法嘅首階段公眾諮詢，雖然港府官員再三呼籲勿繼續虛耗時間喺公民提名上，而內地護法亦來港宣傳《基本法》規定只有提名委員會才擁有提名權，但部分泛民主派仍然堅決要有「公民提名」嘅普選先算係真普選。據聞建制同泛民會喺餘下諮詢期嘅衝刺階段，會對公民提名呢個意見展開大鬥法，各出奇謀，相信大家可以買定花生等睇戲喇。
陸續有區議員提動議
唔知大家仲記唔記得，自從有學者同泛民議員喺去年初，話要爭取真普選而提到佔領中環行動（佔中）計劃，建制派就喺年中陸續發起「反佔中」嘅輿論戰，全港十八區區議會相繼有議員提出反佔中動議。據聞佢哋近日計劃第二波行動，就係動議「反對公民提名」喇。繼北區、油尖旺及元朗等區議會有議員提出呼籲社會支持普選方案要符合《基本法》同全國人大常委會決定基礎嘅動議後，離島及觀塘等其餘啲區議會將有議員提出相關動議。
不過，面對建制派嘅攻勢，聽聞泛民黨派嘅高層最近就密謀緊喺北京開人大及政協兩會期間，即未來兩個星期，喺香港以爭取冇篩選嘅普選為名，搞個集體絕食行動。呢個計劃暫時仲係非常機密，究竟點搞、喺邊度搞，又會唔會一邊佔中一邊絕食等都冇人知，淨係知道唔係一、兩個人參加嘅事，而參加者仲係大家都意想不到嘅人物喎，真係撲朔迷離，莫非今次絕食行動係有幕後人策劃嘅？
政改早餐會勢多空櫈
至於早前話同中聯辦回請立法會有關嘅政改早餐會，據聞除咗部分激進泛民議員講明話會杯葛早餐會外，工黨就只會派一個人參加，皆因佢哋認為提名委員會會有篩選，而有篩選嘅普選先係「鏡中花，水中月」，所以再傾都冇意思喎。既然冇意思，又點解要派人參加早餐會呢？莫非驚蝕底？至於民主黨同公民黨就總共有十個人出席，所以就算建制派議員全部到齊，呢四場早餐會最後都可能空櫈多過人囉！