中環出更：邀CY主禮校慶 大輝唔認「破冰」
十年人事幾番新，由立法會議員林大輝創立嘅林大輝中學創校已十周年。尋日該校舉行周年慶典，大輝就請咗特首梁振英（CY）主禮，佢哋仲齊齊將有紀念價值嘅物品擺入時間囊，等十年後先攞返出來。
放唐唐合照入時間囊
不過大輝當住CY面前，放咗前政務司司長唐英年等嘉賓出席該校奠基禮時嘅照片入時間囊，唔通時移世易，好朋友都要擺埋一邊，放落時間囊？
CY抵達學校時，大輝親自迎接，兩人又熱情握手，唔知嘅都好難想像佢哋喺特首選舉時係敵對陣營。典禮上有放置時間囊儀式，大輝將當年申請辦學嘅計劃書、創校時嘅學生名單、學校奠基禮及尋日慶典嘅照片都一併放入時間囊，而CY就放咗尋日寫畀該校嘅紀念卡。CY仲話，希望十年後可以返學校同大家一齊見證時間囊出土。
卓妮問大輝今次請CY主禮，大家係咪「破冰」，大輝就矢口否認，只係教育無分陣營、黨派同政治，係人人有責，佢只係想請特區政府最高領導人來見證學校重要一刻。至於十年後會否再請CY出席學校廿周年慶典，佢就話︰「到時梗係希望請當時嘅特首啦！」
卓妮