政情：詠藜園推健康月餅籌款
又到中秋月餅熱賣嘅季節，憑着擔擔麵揚名嘅食肆詠藜園，今年搞新意思推出宮庭御膳秘方炮製而成嘅「紅棗核桃月餅」等三款健康月餅，為理工大學及香港乳癌基金會籌款。詠藜園主席楊黃小玲尋日喺宣傳活動上話，由於夫家祖輩曾經係慈禧太后御廚，因此特別將昔日皇室享用嘅美食呈現香江。
詠藜園同理大修讀食物安全課程嘅同學一齊合作，包括選材採購、生產、營銷到收支控制等，教學生如何經營一盤有良心嘅飲食生意。今次推出嘅月餅，更選用海藻糖等低脂嘅健康食材。乳癌基金會副主席麥黃小珍、理大副校長阮曾媛琪及一班同學都有出席，眾人仲一試月餅為快。