中環出更：黃傑龍冧莊「稻苗」主席
食材漲價，加上最低工資有調升壓力，飲食界百上加斤。匯聚業界才俊嘅「稻苗學會」，日前喺會展舉行新一屆執委就職禮。叙福樓集團執董黃傑龍（Simon）冧莊做主席。喜事何止一單。大家樂集團主席陳裕光，宣告明年首次抱孫，可喜可賀。
Simon就職，飲食界猛人雲集，除稻香集團主席鍾偉平、翠華集團主席李遠康、新光酒樓集團創辦人胡珠外，仲有香港生產力促進局主席陳鎮仁等，席間話題離不開傾吓最低工資擬加到三十元。鍾偉平大嘆無奈，擔心咁樣會產生漣漪效應，連帶中高層同事都要加薪，但最令佢頭痛，仲係有工無人做。佢直言集團過去一年，有成六百多個空缺，肯畀錢都請唔到人。
經營酒樓嘅胡珠都嘆皮費愈來愈重，幸而今年「仲頂得住」，明年就要加價百分之三至五嘞。Simon都嘆飲食界青黃不接，後生仔嫌辛苦唔願入行，請人難過登天，促請政府考慮將部分工種引入外勞。
陳裕光就嚟做阿公
將重出江湖任某機構高層嘅前民政事務局常秘尤曾家麗都亮相熱身。見尤太清減咗，原來過去兩年佢勤力行山，眨眼減走四磅肉，人都精神爽利。同場嘅陳裕光春風滿面。千金陳浩寧懷孕四個多月，仲係一索得男。首次抱孫，陳裕光笑到見牙唔見眼。佢喺大埔嘅十五萬呎廠房年底投產，生意咁順，睇嚟孫仔好旺佢噃。
卓妮