呢個世界，賴皮塞責講大話，其實都需要有啲本事，講得白啲，呃飯食都要有兩三道板斧。想做政治家，自然要有政治家嘅風範辯才，要做江湖術士，也要有兩招看家本領！
煲呔曾自詡「政治家」，卻不學無術，狗噏「民主等同文革論」，已露底有幾多料子；如今明明涉「身份危機」、「曾商勾結」。「租住豪宅」單是裝修都成千七萬港元，醜聞爆不停，坐富豪遊艇「自費」區區六百多元，認真係濕濕碎使乜計！
以前啲江湖術士，行走江湖，都要有一技傍身。譬如有客人問：你睇我有冇媳婦呢？相面先生用筆在紙上寫六個字：「鰥居不能有妻。」
寫完，反向客人問道：「你到底有冇媳婦呢？」客答：有。睇相佬依起棚牙，指住佢寫嘅六隻字唸唸有辭：「鰥居不能，你係唔可以鰥居架！」接着往下唸：「有妻，你係有媳婦嘅！」客人於是信服佢識睇相，準！高明！
之不過，如果客人話：高人，我冇媳婦噃！睇相佬又用手指住嗰六隻字：鰥居呀，你獨居！接着又用手指住往下唸「不能有妻！我一早睇穿你這人是鰥居啊，不能有媳婦。」
看官，這「鰥居不能有妻」六個字果然妙不可言，說有媳婦也成，說沒媳婦也成。今煲呔曾豪遊濠江，你話佢「自費遊」可以！話佢有富貴朋友請，都得！煲呔曾向來灑脫，既視民望如浮雲，自然亦視錢銀如垃圾！乜幾千萬係豪宅咩？