僭建問題真係好鬼死頭痛，一來數量繁多，二來不易揭發，三來執法疏懶。於是乎咯喎，香港遲早變成僭建之都，畢竟連特首、司長同局長都係僭建業主，小市民梗係有樣學樣啦。
僭建數量繁多唔使講嘞，大家隨便去新界丁屋村落走一趟，觸目所及都係三尖八角怪獸屋。至於不易揭發，咁就多得特首候選人唐英年親身示範，原來富貴人家嘅豪華獨立屋可以一不小心就「掘深咗」，掘出一個隱蔽性極高嘅地下宮殿，如果唔係知情人士一嘢踢爆，外界真係唔會發覺掘窿竟然掘出別有洞天。
至於執法疏懶又點睇呢？不妨以一宗申訴專員公署提供嘅個案作為例子，正所謂見微知著，睇完呢一宗個案大家應該明白唐英年之流點解會咁無法無天。
申訴專員公署接獲一名大廈住客嘅投訴，事主居住於一幢大廈嘅頂樓單位，樓上天台屬於私人擁有，並且有違規僭建物，體積大到好似起多咗成層樓。事主○六年起多次向屋宇署同食環署嘅聯合辦事處投訴，因為樓上僭建物搞到天花滲水，屋宇署居然認為冇明顯結構安全問題而停止跟進。去到一○年，滲水惡化，石屎剝落，鋼筋生銹，屋宇署先至搵天台業主要求處理。問題係，你估天台業主係邊個吖嗱？哈，原來係特區政府呀，該煨！
件事係咁嘅，涉事大廈嘅地契早於一九九二年屆滿，天台原業主嘅合法繼承人一直冇完成地契續期，所以政府就變成天台臨時業主，由地政總署代理相關事宜。所以咯喎，屋宇署一○年三月致函地政總署強烈勸諫盡快清拆僭建物。之但係地政總署拖得就拖，以政府並非永久業主為由斷然拒絕。搞來搞去搞咗一大餐，地政總署先至實地視察並且徵詢法律意見，直至去年年底由署方清拆僭建物。
申訴專員黎年就批評嘞，地政總署拖延十三個月先至處理問題，態度官僚僵化，令到投訴人長期飽受危樓威脅同滲水滋擾。黎年認為，政府既然係業主就責無旁貸，政府唔處理事主真係投訴無門。
呢嗱嗱嗱，明白未呀？官僚僵化嘅後果就係僭建成風。更正更正，嚴格而言應該話係僭建成瘋，好似唐宮風暴咁吖，僭建面積竟然多達二千幾平方呎喎，幾瘋狂呀！
其實講真，執法長期疏懶唔係冇理由㗎，睇睇曾蔭權就知發生乜嘢事。佢自己都係長期疏懶，淨係識得群埋富商黐飲黐食，搭完超級遊艇宿一宵之後，掟低幾舊水「渡輪費」就算數，白吃白喝連住宿費都慳番。有咁嘅特首，自然有咁嘅官僚啦，上樑不正下樑歪，一個二個目無法紀！