政情：何君堯選區會主席慘敗
鄉議局主席劉皇發因為失落屯門鄉事委員會主席寶座，連帶佢嘅屯門區議會當然議員及區議會主席都無埋，尋日要進行補選主席。我哋尋日預告過，新任屯門鄉委會主席何君堯想更上一層樓，同民建聯梁健文爭做區會主席，前日仲約埋發叔密斟。不過，何君堯尋日就以九票對廿二票慘敗，連佢自己都形容今次真係輸到「阿媽都唔認得」。
民記喺屯門區會就有十三票，加上提名梁健文參選嘅發叔兒子劉業強以及建制派票源，難怪攞到廿二票咁多。至於何君堯則由鄉事派陶錫源提名，另外兩位鄉事背景嘅區議員蘇炤成、古漢強和議，但蘇炤成就請咗假無去投票，唔通何君堯攞到嗰九票包括咗泛民主派區議員？不過，最弔詭都係有三票白票，難道有人覺得兩個都揀唔落手？
由於梁健文之前係屯門區會副主席，佢選擇辭去副主席去選主席，副主席空缺就要喺下次區會補選。經歷失敗嘅何君堯話，今次輸咗，下次都唔會再選副主席。不過，呢屆區議會只剩下半年任期，之後又重新洗牌，相信會再出現新一輪激戰。