政情：劉慧卿催生新聞界怪胎
尋日係「世界新聞自由日」，原意係慶祝新聞自由，同埋向啲為新聞自由而犧牲嘅新聞工作者致敬。做記者出身嘅民主黨副主席兼立法會議員劉慧卿，尋日高調發聲明畀全港市民，副本仲送埋畀各大傳媒機構及新聞人權組織，引述其他機構嘅民調，指香港嘅自我審查日益嚴重及新聞工作者人工偏低。其實香港新聞界搞成咁，劉慧卿可能都係始作俑者之一，新聞工作者待遇問題亦唔係佢講得咁簡單，依家仲反過來藉此抽水，真係唔要得！
劉慧卿喺信中引述港大民調，指有五成四市民認為香港新聞傳媒有自我審查，創回歸後新高，又引用早前嘅港鐵廣告代表向報章發警告信事件，指商界透過抽廣告干預新聞報道嘅問題常有發生，有違新聞自由同編採自主。
其實港大民調自己亦指出，香港並非缺乏新聞自由，問題係濫用新聞自由嘅情況愈嚟愈嚴重。當中嘅表表者就係壹傳媒集團主席淫賤黎創辦嘅《蘋果日報》，當年劉慧卿仲有份喺立法局幫手製造呢個怪胎，聲稱《蘋果》遭受打壓，但事實上講到新聞道德同專業操守，呢個爛蘋果都出晒名。
濫用新聞自由 編輯非自主
《蘋果》又不斷濫用新聞自由，處處針對中央政府同偏幫泛民主派，近年仲踩過界直接介入政局，例如出號外撐「民主阿婆」陳方安生參選同大搞密室飯局策動「五區公投」等，令旗下新聞工作者終日自我審查，喪失晒編採自主，點解劉慧卿又唔發番個聲明，譴責呢個爛蘋果呢？
劉慧卿份聲明又引述一個新聞組織嘅調查，指香港新聞工作者待遇偏低，呼籲傳媒機構善待員工。其實傳媒機構同其他企業一樣，有高層、中層同基層員工，正正由於新聞工作係一項專業，新入行嘅基層員工，自然需要所屬公司投放大量時間同資源加以培訓，開始時人工偏低係好正常嘅，劉慧卿自己做呢行出身，冇理由唔清楚實況啫。
睇番近年本港嘅新聞傳媒業發展，可以用開花結果、百花齊放嚟形容，電台、電視、以至網上嘅新傳媒不斷湧現，好多之前人工偏低嘅新聞工作者，都已成為業內嘅中流砥柱、高薪一族，劉慧卿本人更加做埋尊貴嘅立法會議員，所以真係唔知佢想呻乜！