中環出更：拉隊入馬場 哥頓心情靚

好多城中名人出埠旅遊未返，少咗唔少馬場常客嘅身影。黃士心嘅「旅遊大亨」同「駿方」同場競賽，帶住黑超嘅Jason同媽媽未趕得切坐低，索性企喺度望住電視機觀賽，可惜最終愛駒落敗，細佬做馬主嘅「旅遊小子」喺第十場出賽都輸埋。Jason話，爸爸去咗東南亞考察，尋日冇入場，卓妮都唔見黃進德影子。

洪祖杭千金代父拉頭馬

尋日拉頭馬有新面孔出現，好似全國政協常委洪祖杭隻愛駒「駿方」喺第二場跑出，贏得卅六萬多元獎金，拉頭馬時唔見馬主，反而多咗幾位青春無敵嘅少男少女，其中一位笑容甜美嘅Stephanie係洪祖杭千金。佢話爸爸唔得閒嚟，有得同一班同學仔一齊拉頭馬好開心。

由於要坐鎮睇實盤生意，Jason聖誕期間冇得外遊。佢接班後仲未坐暖，但已經歷咗菲律賓人質事件同埋歐洲大風雪嘅考驗，好彩康泰員工好有經驗，唔使佢太操心。Jason話佢諗緊搞啲特別嘢，但暫時賣關子，遲啲至話畀卓妮聽。

率領大班人馬入場撐愛駒「風力威猛」嘅哥頓，雖然隻馬四甲不入，但佢依然心情靚絕。卓妮問佢今年埋單計數，滿唔滿意公司成績？佢笑住話：「滿意！車流多咗囉！」合和喺內地投資唔少收費公路，內地人多、車多，佢仲唔賺到盆滿缽滿？卓妮又問佢點睇本港樓市及股市，佢竟然話：「我唔識！」哥頓認真謙虛啦！

戴住黑超嘅香港資源執行董事許浩明入沙圈探愛駒「甜蜜至上」，2R成員Rosanne同老公（左二、一）亦同行。 （何偉鴻攝）

黃進達（左）同媽媽企喺度望住電視轉播賽事，神情肉緊。

卓妮