中環出更：梁栢賢初踏馬場四圍貢
醫管局行政總裁梁栢賢尋日罕有地現身馬場，原來佢應馬會大董兼恒隆集團董事總經理陳南祿（Philip）之邀，專程入嚟食飯。未上樓赴宴之前，佢仲特登一個人周圍逛，足迹踏遍投注櫃位同埋賽馬跑道，又參觀吓沙圈，成個「劉姥姥入大觀園」咁，都幾搞笑。
梁栢賢一見到卓妮就笑笑口話自己平時好少入馬場，今趟係Philip請佢食飯先現身。坊間傳言第一次入場嘅人多數有好手氣，卓妮梗要問吓佢會唔會落些少投注試吓？佢耍手擰頭話：「唔會啦！我都唔識！」睇嚟Philip要落多啲嘴頭，氹多啲朋友買馬，咁馬會先至有本做善事嘛！
連續三日嘅聖誕假結束，梁栢賢今日都要返到工作崗位，佢話去咗英國讀書嘅大女返港度假，過埋元旦先至返英國，所以全家人可以留港團聚。佢履新冇耐，笑言工作唔辛苦，依家諗緊點樣做好醫管局服務嘅同時，又可減輕員工工作壓力。吓？除咗增聘人手之外，冇咩板斧喎！