政情：王敏超借申亞數政府
民政事務局鐵定喺下月十四日就六十億元申亞撥款硬闖立法會，為免由廣州亞運喺香港掀起嘅體育熱情，隨着聖誕寒風迅速冷卻，港府接連喺官方新聞稿刊載多名亞運金牌運動員同體育界人士嘅訪問，明顯要擺佢哋上枱硬銷申亞，令近日嘅政府新聞網好似變咗體育專版咁。
不過，由於港府多年來都推動體育不力，本港有番一定知名度同國際大賽成績，而且又肯拋個身出嚟力撐政府嘅，數來數去都係得嗰幾個，令當局嘅文宣攻勢無以為繼，惟有退而求其次改為訪問一啲唔係運動員出身嘅體育界人士，或者喺以前為香港創過佳績嘅退役運動員，例如尋日就輪到香港業餘游泳總會義務秘書王敏超接棒。
王敏超曾贏得三屆渡海泳冠軍，六十同七十年代更參加過兩屆奧運同三屆亞運會，不過佢喺支持申亞之餘，亦喺訪問中力數本地游泳設施幾咁不足，香港體育發展幾咁落後等，似同港府倒米多啲。佢又話，業餘游泳總會正向政府申請復辦早於一九七九年停辦嘅維港渡海泳，希望香港有番一個矚目嘅賽事，間接批評港府過去三十年推動游泳運動及保護維港不力，令佢嘅成名作渡海泳被迫停辦。