政情：關愛基金籠裏雞作反
政府扶貧無心又無力，自己坐擁以萬億計儲備，照樣厚住面皮揼商界心口成立百億元關愛基金，惹來政界、社福界、以至個別商界人士圍攻，就連由政府委任幫手監管關愛基金嘅督導委員會成員，包括港大社會工作及社會行政學系講座教授周永新、社聯行政總裁方敏生同社福界立法會議員張國柱等，都先後「籠裏雞作反」，公開鬧爆政府嘅扶貧政策同關愛基金嘅運作同成效，尋日又輪到社區組織協會主任何喜華接力，可見呢個基金係幾咁唔得民心！
為「河蟹」吸納異己 打錯算盤
政府近年經常吸納啲成日批評政府嘅人士，進入相關嘅諮詢委員會同法定機構，希望可以令佢哋收聲唔好再公開鬧政府，就算要鬧都閂埋門喺個會上面鬧好喇。曾經形容關愛基金係「目的不明嘅怪物」嘅周永新，盛傳就係因為呢個原因獲委任入督導委員會，不過佢之後都好有腰骨，冇就此收口變身保皇黨。其他成員如方敏生、張國柱等，亦曾公開批評關愛基金影響原有社福慈善機構嘅籌款活動，對真正需要急切援助嘅弱勢社群未必係一件好事。
何喜華幫咗窮人三十年，當然亦唔會咁容易畀政府統戰到，佢尋日喺電台節目指出，關愛基金要用得其所，首要條件就係「多用快用」；又指其實政府過往都設立咗唔少基金，不過因為行政因循，搞到啲善款用得又慢又少，好似兒童發展基金咁，立法會財務委員會○八年明明批出三億元撥款，至今足足兩年都只係用咗二千萬唔夠，認真嘥料。
至於主要由六合彩款項成立嘅獎券基金，原來仲誇張，至今已經累積到有八十億元，何喜華拎出呢堆數字，即係話畀大家知，其實香港已經有好多可以用嚟扶貧嘅錢，不過一直都只係擺埋一邊，市民繼續捱窮、錢就繼續攤凍。佢強調香港貧窮問題嘅癥結，係所謂嘅六大產業全部只向高學歷人士傾斜，完全冇考慮過開創職位畀班低技術勞工，結果搞到貧者愈貧、富者愈富。
何喜華雖然冇點名炮轟關愛基金，但係就暗諷政府坐擁大筆儲備，但係就一直抱住守財奴嘅心態，唔肯用二萬億元儲備去扶貧，反而仲去呼籲市民捐錢，認真諷刺。政府以期透過統戰啲反對聲音令佢哋收口，倒不如虛心聆聽吓對方嘅反對意見好過！