中環出更：陳振彬開P多國菜式款客

「味酒得」指美食佳釀共歡

「味、酒、得」Party個名聽落好似未走得住，但每個字都好有意思。「味」係融會多國美食；「酒」就按字面解作靚酒意思；而「得」字就指老友共聚，開心快樂。卓妮喺會場見到嘅賓客多到數唔晒，好似健康快車創會主席方黃吉雯、金城營造主席王國強、太子珠寶鐘錶主席鄧鉅明夫婦及執董朱繼陶夫婦、媽打李麗娟、「少年食神」林澄光（Michael）等。

政府官員都好捧場，包括入境處處長白韞六、民政事務局副局長許曉暉及常秘楊立門、食物及衞生局副局長梁卓偉等，仲有醫管局主席胡定旭、公民教育委員會主席李宗德、全國青聯副主席陳仲尼、前警務處副處長馮兆元及久未露面嘅教聯會長楊耀忠。

大家成晚都摸住酒杯底傾到雞啄唔斷，仲歎盡供應源源不絕嘅多國美食，最搶手都係板長壽司新鮮空運抵港嘅築地魚生。

今年Bunny預訂嘅日本魚生真係唔講得笑，包括五千克來自青森縣大間天然藍鰭吞拿魚，全部腩位，每千克售價二千八百元，仲有二十千克千葉縣象蛂蚌、一百隻北海道北寄貝及廿五盒凡立貝，仲有廿五盒、一盒五排嘅大海膽，最少價值三至四萬港元。「板長」特別派出遊戲節目《超級無敵獎門人》御用日本料理師傅金城雅洋及多名師傅到場炮製頂級魚生，極受歡迎。

作為主場嘅Palco行政總廚Ken Lau就親自下廚，炮製一系列出色意大利及法國菜式，有焗芝士法包、蒜片炒牛柳粒、煎鵝肝、龍蝦雲吞、香蒜辣椒炒意粉、黑松露野菌雞柳扁意粉、香煎龍脷柳配蟹肉忌廉意大利飯、意式香腸配煙肉芝士薄餅、野菜湯浸豬手配黑松露薯蓉等，菜式供應源源不絕，做到無停手。Palco老闆之一嘅金牌經理人Paco黃柏高都親自到場視察，順便見吓啲好朋友。

至於「太極樓」京滬飯店就供應最耍家嘅小籠包、五香牛、涼拌茄子、水煮牛肉等，可以話各有特色，大家盡興而歸。

阮丹蕾年紀輕輕就創業搞「太極樓」，主攻小籠包等京滬菜式，後生可畏。	Palco行政總廚Ken Lau親自烹調龍蝦雲吞等意法菜式，大家讚不絕口。	煎鵝肝
蒜片炒牛柳粒	龍蝦雲吞	《超級無敵獎門人》御用日本料理師傅金城雅洋，特別到場為大家炮製頂級魚生。
頂級魚生	藍鰭吞拿魚

卓妮