政情：陳維安長假刨書磨時間
聖誕節除了出埠度假、食聖誕大餐之外，仲可以做啲乜？教育局副局長陳維安就推介大家睇書啦！第三屆香港聖誕書展尋日喺灣仔會展舊翼揭幕，擔任主禮嘉賓嘅陳維安話，喺呢幾日長假中，消磨時間嘅最好選擇就係閱讀，唔知佢鍾意睇咩書呢？
肥亨愛睇武俠小說
中策集團主席馬時亨都嚟撐場，佢話自己細個時鍾意睇武俠小說，好似經典武俠小說《神雕俠侶》，佢就咪過。佢奉勸後生仔唔好睇咁多電視，因為小說比電視更加精彩。自從肥亨辭官歸故里之後，依家佢又有多啲時間睇書，仲話睇書可以刺激頭腦，增加幻想空間，尤其是小說，意想不到嘅橋段吸引人一路追，好好玩。
今次書展由尋日起至三十日止，有逾七百家出版社同供應商參加，展出逾百萬本中英文圖書。主辦機構特登贊助一百位長者同一百位基層學童參觀，成為首批入場嘅嘉賓，每人除咗獲安排專車免費接送同提供免費午餐之外，更獲贈二百元書券，現場開心又熱鬧。