政情:龔仁心自嘲開空頭支票

華懋慈善基金尋日搞咗個「慈善中國 和諧社會」論壇,活動冠蓋雲集,除咗邀請咗幾位內地大慈善家、好似世貿房地產主席許榮茂同有「內地首善」之稱嘅陳光標即席分享行善心得外,連全國政協副主席李金華、中聯辦副主任黎桂康同多位港區人大代表和政協委員都有撐場,場面好熱鬧。

對官司充滿信心

華懋慈善基金喺活動上向多個慈善團體捐贈支票,不過主席龔仁心自嘲話,基金會依家官司纏身,唔可以動用存款,所以呢啲暫時只係空頭支票,佢睇住一大筆錢但唔捐得,內心相當唔好受。不過佢話知道中央政府同香港市民都好支持佢哋繼續行善,所以內心仍然好欣慰。佢承諾,一旦官司解決,會即時捐出承諾嘅款項。

華懋集團前主席龔如心嘅遺產爭奪戰預計下個月初再次開審,問龔仁心會唔會覺得緊張,佢以一向嘅自信話:「冇緊張,我信天地有正氣!」龔仁心仲透露,自己三個星期前曾經提議動用集團部分盈利行善,但最終畀一啲「以為自己有權」嘅人反對,所以暫時擱置咗喎,佢都覺得好可惜咁話;至於佢所指何人,佢就冇講明喇。

Money18新功能「18好路數」為你預測心水股票升跌機會率