政情：特首辦筍工爭崩頭
自高鐵事件後，港府大力推動電子公民參與（e-Engagement），力圖為吸納青年人民意手法過時嘅負面形象洗底，新猷係開特首辦facebook（fb），早前更公開招聘兩名項目主任，主責管理fb網頁，月薪超過兩萬三千元，成為搶手筍工。有「特首辦新媒體總管」外號嘅特首辦特別助理陳岳鵬尋日透露，今次共收到三千份應聘申請，即平均一千五百人爭一個位，可謂爭崩頭。如果特首辦fb外界都有咁好反應，港府嘅民意工程應該唔使咁頭痕啦。
特首辦fb管理員嚴格嚟講係陳岳鵬嘅左右手，即係特首辦特別助理嘅特別助理，合約期為十八個月，月薪兩萬三千元至兩萬七千元，另有底薪一成五嘅約滿酬金，價錢係咪太貴，見仁見智。不過，特首辦fb原本嘅政治用途，就係要強化同年輕人嘅溝通渠道，通過呢兩份筍工，特首辦fb已經喺年輕IT界引起哄動。
要求外向具時事觸覺
陳岳鵬尋日喺一個酒會時對記者講，招聘期內共收到三千份應聘申請，競爭激烈，當中又以年輕人為主，經過兩輪篩選，已經揀選出兩人，預期今個月內返工。陳岳鵬對兩名特首辦新成員的詳情三緘其口，但稱條件必須性格外向，事關返工唔止玩fb咁簡單，仲要做對外聯絡工作，語文能力亦要有番咁上下，更加要有創意，始終fb嘅對象為年輕人，呆板沉悶嘅性格肯定趕客。要符合以上咁多條件，傳媒同公關界出身就最適合。
陳岳鵬又話，fb管理員唔熟悉政府運作唔緊要，反而有時事觸覺更重要，所以面試問題都會考應聘者對時事嘅睇法，好似八達通出售客戶私隱資料圖利、資助市民置業同社會仇富心態咁，嚴謹度拍得住遴選政治助理。唔知做fb管理員使唔使放棄外國護照呢？
陳岳鵬身為「特首辦新媒體總管」，對時下資訊潮流玩意理應了然在胸，但佢原來亦有盲點。陳岳鵬最近不甘後人買咗部iPhone4，用開iPhone嘅用戶都知有一個叫「WhatsApp Messenger」嘅軟件，下載後用戶之間就可免費傳手機短訊。不過，陳岳鵬尋日喺記者口中得知WhatsApp後，竟露出驚訝神色，好似發現新大陸一樣，即時下載試用。其實，WhatsApp係iPhone用戶最熱門嘅下載軟件，長期排首位，好多年輕人都知道；陳岳鵬快啲學多啲嘞，否則畀兩個新下屬追過就唔好啦！