政情：田少派叉燒飯響頭炮
自由黨風雨滿途，前正、副主席田北俊同「莎姐」周梁淑怡回朝坐鎮，分別擔任榮譽主席同副主席，外界關注兩位黨內元老會落乜重藥，令自由黨妙手回春。不過，田少同我哋坦言，短期內唔會對自由黨進行大手術嘞，事關黨內唔希望再有大變，佢反而會實際啲全力瞓身落區吸票，頭炮係下個月落沙田向長者派六百碗叉燒飯，跟住去埋港島山頂拖狗巡遊，搞關愛動物運動。田少呢鋪真正想靠「兩條腿走路」撐住自由黨。
○八年自由黨敗走直選戰場，田少同莎姐雙雙落敗，主因係地區工作不力，大量流失票源，呢個正係自由黨死穴。田少承認，過去偏重聯繫工商界，地區活動只派當區區議員撐場，犯上直選大忌，所以佢回歸自由黨，首務唔係嚟一場翻天覆地大改革，而係做「跑手」，跑勻港九新界，親身落區吸票。尤其母親節、中秋晚會同春茗團拜，「畀地區人士見你多啲，影吓相，陳太、李太都好，見你多咗囉，就化番做選票。」
田少要選票，唔計較得咁多身段問題，可能無乜人諗到，佢重返自由黨擔任榮譽主席，頭炮係派叉燒飯。田少話，喺沙田搵到一間食肆以成本價贊助，歡迎區內嘅公公、婆婆免費入內進食，行動喺下月中分四日進行，每日一百五十個限額，田少、莎姐同主席劉健儀，四日裏面梗有一個會現身「陪客」。
密謀重奪山頂地盤
自由黨喺直選戰場有兩個傷口一直未埋口，一個係上文提到嘅○八年新界東、西雙雙敗北，一個係○七年區議會選舉輸掉港島山頂選區。自由黨正密謀武士復仇，田少話，下月去完沙田派叉燒飯，仲會擇日落港島，喺山頂搞寵物遊行，宣揚關愛動物訊息，山頂居民個個富貴，人人養貓狗，田少帶埋愛犬現身，顯然又係嚟吸票，為自由黨明年區選重奪山頂地盤鋪路，田少若然真係瞓身落區，未來兩年睇怕要做多啲腳部按摩至得嘞。
田少躊躇滿志，挽救自由黨政治前途，但最終能否東山再起，喺新界東捲土重來呢？當前黨內有直選實力嘅，除田少外，仲有莎姐同劉健儀，最終由邊個出戰新東，又能否成功武士復仇，大家不妨睇睇佢哋有冇咁嘅能耐。