政情：傳黃仁龍因「廢法」劈炮
政界傳咗好耐指黃仁龍想劈炮，唔做律政司司長，重出江湖執業搵真銀，最近呢個傳言愈傳愈烈，尋日更加有消息言之鑿鑿話，黃仁龍最近的確劈過炮，導火線仲係早前鬧到滿城風雨、將行政立法推向世紀對立局面嘅擴建將軍澳堆填區風波。
本身係資深大律師嘅黃仁龍，對現時份律政司工作無心戀戰，已係政界公開秘密，唔係又點會過去幾年每隔一段時間就傳出佢想劈炮消息吖，不過，指佢因堆填區風波而遞大信封，呢個講法就幾嶄新。
不過，黃仁龍喺堆填區風波嘅角色，又的確幾受爭議，事關唔少建制派中人都批評，風波原屬地區民生問題，但律政司突然出聲明，指立法會無權廢令，搞到成件事失控，一發不可收拾，統領律政司嘅黃仁龍責無旁貸。至於黃仁龍究竟係因孭鑊辭職，定係份聲明其實係政府逼佢發出，所以事後發老脾劈炮呢？爆料人唔肯透露，我哋去問律政司司長新聞秘書，回覆話：「絕無其事。」信住先啦！