政情：蘇錦樑亂抄功課捱轟
抄襲係壞習慣，亂抄一通更加抵打！多次喺立法會審議競爭法嘅草案委員會上慘成箭靶嘅商務及經濟發展局副局長蘇錦樑，尋日喺委員會上再被萬箭穿心，罪名正係亂抄嘢。
蘇錦樑再為競爭法護航，指條文已經參考咗國際最佳嘅做法，叫議員可以參考外國案例，此話一出，即刻引發反對立法嘅議員群起圍攻。新民黨主席葉劉淑儀批評直指，政府真係好不智，歐盟將競爭法當係貿易武器，攞嚟同美國大企業鬥法，政府瞇埋眼亂抄一通，真係唔知「英文退化定大腦退化」。
蘇錦樑喺加拿大讀法律，英文應該無咁易退化，不過，唔代表抄襲外國一套，就一定識揀好嘢嚟抄，保險界陳健波亦認同葉劉嘅觀點，指特區政府為競爭法立法，只係識左抄抄，右抄抄，全世界最辣嘅抄晒出嚟，炒埋一碟，食死香港人，拜託港府唔好再亂抄一通。蘇錦樑被炮火猛轟，一向講嘢啜核嘅旅遊界謝偉俊贈興話，立法太急，好易出事，問蘇錦樑有冇開始聞到火羅味？其實，蘇錦樑一早已經被炮火燒燶咗啦！