中環出更：肥亨潮戴odm限量腕錶
中策集團主席馬時亨打扮一向好formal，好少見佢作潮人裝扮，不過早前卓妮見佢戴住一隻專攻年輕人市場嘅odm潮錶，錶圈反傳統由十二個小洞取代時間刻度，簡約有型，銀色錶圈配上黑色膠帶，襯到肥亨成個人後生晒。肥亨笑稱，隻錶係三年前慶祝回歸十周年嘅限量版，背面有佢親筆簽名，全球獨一無二！
刻上簽名 獨一無二
肥亨話，佢平時戴開嘅錶壞咗，所以就摷番呢隻擺放咗幾年嘅紀念錶戴，連囡囡都讚隻錶好潮、好好睇。原來○七年香港設計中心為香港回歸十周年舉辦一個名為「九七○七」活動，odm同英國著名工業設計師Michael Young聯名設計咗呢款Euclide系列，當時限量發行一百五十隻。香港錶廠商會會長兼odm老細蘇永強送咗一隻畀肥亨，錶背唔止有設計師簽名，仲有肥亨自己嘅簽名添，全球只此一隻。
odm專攻年輕人市場，佢哋嘅設計大膽有趣，色彩繽紛，潮味好濃。早前卓妮就見蘇永強戴咗「3 touch」系列時款模擬電子腕錶，相當有型！
