中環出更：九巴新抱掃童裝迎聖誕

貴為中環置地常客，Jane每個月起碼「巡視」番幾次，除買嘢畀自己外，仲體貼埋家人。早前一個星期一下午，拎住鱷魚皮Hermes手袋嘅Jane約爸爸去Cafe Landmark歎茶，闊太生活真寫意。Jane爸睇落去好後生，拍埋喺囡囡身邊，十足兩兄妹。

好友仔女都有份

閒話家常後，Jane爸say goodbye走先，留番囡囡獨自「巡街」，目標係星級爸媽至愛嘅高級童裝店ABEBI。Jane揀起多件男女童裝左拼右拼，睇到入晒神，最後敲定一件醒目有型嘅D&G童裝羽絨褸，叫店員包起，另外再揀多幾件童裝，出手快夾準。入咁多貨，送畀仔女做聖誕禮物？Jane甜笑話，買畀三個仔女之餘，好友嘅仔女都有份，聖誕節普天同慶，佢唔會偏心喎。

ABEBI囊括多個名牌嘅童裝副線，包括Kenzo、Armani Junior、D&G Junior、Diesel、Moschino等，款式新穎，簡直係小孩嘅歡樂天地。店內嘅衫，定價拍得住成人服裝，舖頭內亦有小量成人女裝，方便媽咪同仔女大玩名牌親子裝。

ABEBI名人客仔多，天后王菲都係粉絲，早前來港，豪氣地掃十五件T恤及衞衣，大出血也面不改容。

名牌童裝衫設計靚，Jane揀到入晒神。	家中有三個仔女，Jane買衫都要預三份。	店員將Jane睇中嘅D&G童裝風褸包起，然後送去佢屋企。

卓妮