中環出更：楊華勇撐吳傑莊拉隊睇WG
以一首《Nobody》紅爆嘅韓國女子組合Wonder Girls（WG），上周五晚喺亞洲博覽館開騷，吸引大批歌迷入場一睹五位靚女嘅風采。音樂會搞手全國青聯常委吳傑莊（Johnny）同太太拍拖前來，佢話希望將來可以舉辦多啲國際性娛樂活動。
當晚百仁基金副主席楊華勇同一班朋友前來，佢話自己淨係識得《Nobody》一首歌，擺明車馬係嚟撐Johnny。事關Johnny有份牽頭成立嘅中山青聯，而佢同朋友們都係成員，所以大家一齊嚟撐場。
當晚贊助商之一嘅金至尊副董事長徐傳順同太太一齊入場，但徐生唔肯入鏡，笑言最近曝光太多喎！其實係囡囡徐子淇頻頻曝光就真，因為大家都關心佢傳宗接代嘅進展嘛！