中環出更：鄧鉅明入馬場晒30萬名錶
睇佢隻錶，就知男士心思有幾多。天天新款唔係女人專利，太子珠寶鐘錶主席鄧鉅明（Jimmy）都愛玩錶款，腕上名錶轉不停，近期新寵係Cartier Santos 100 Squelette，尋日戴佢入沙田馬場，風頭一時無兩。
冷鋒襲港，好多名人都暫時避避寒，即使愛駒上陣，都未見捧場蹤影。Jimmy同公司執董朱繼陶就例外，入場消遣吓。卓妮見佢手上戴住隻Cartier Santos鏤空腕錶，隻錶屬限量版，賣點係羅馬數字造型嘅特殊機芯設計，喺兩片藍寶水晶之間，可以清晰地睇到內裏一百三十八枚手製零件，錶價三十多萬港元。隻錶升值潛力高，Jimmy梗要留隻畀自己。
丁午壽恨食藍芝士
卓妮轉頭見到玩具公司開達集團主席丁午壽（Kenneth），佢旗下嘅「晨速」尋日出戰，主人以黑超Look嚟打氣，造型確係少見。聖誕快到，Kenneth向來喜歡外遊滑雪，但今年唔出門，留港同家人擦聖誕大餐。食火雞？非也。原來佢最愛係藍芝士Blue cheese至真。藍芝士係因獨特發酵方法及加工程序而出現青藍色條紋嘅芝士，香氣特濃，且帶辛辣口感，一般人未必接受，但Kenneth就恨到流晒口水，仲話明知肥幾磅都要擦餐勁。
馬場尋日舉行美聯集團盃賽，美聯物業主席黃建業同太太做東請客。樓市沉靜一輪後又見蠢蠢欲動。黃主席話，買樓時機仍在，手頭資金充裕的話，仍是入市良機。佢分析話，市場熱錢仍然多，投資者首選都係買樓。
卓妮