政府上月公布，前勞工處處長謝凌潔貞紮職，由本月十三日起接替黃鴻超，升任教育局常任秘書長，我哋尋日喺一個中學生活動上見到謝太，想恭喜佢一聲，點知謝太話，佢依家只係「候任教育局常秘」，一場教育界直資風暴，令佢嘅前任黃鴻超要喺原位坐多一會，收拾爛攤子。謝太暫定喺嚟緊星期三正式坐正，紮職遲咗半個月。
謝太依家嘅身份都幾尷尬，之前勞工處處長個位已經被前食物環境衞生署署長卓永興接手，新職卻未能上任，變成半天吊。不過，謝太心情似乎無受影響，尋日出席「學生營商體驗計劃」展銷會時，笑意盈盈，話雖然仲未能成為教育局嘅人，但一直透過電視直播留意立法會對直資風暴嘅聆訊情況，覺得成件事執行上有改善空間，而直屬上司「孫公」孫明揚，亦已經指示佢要小心研究審計報告嘅意見。
一上任就要接手處理直資風暴呢個燙手山芋，謝太並無怨言，話只有天堂先至有完美，凡間每件事都可做得比今日好，總之有工作就做啦！一派淡定嘅姿態。