中環出更：郭炳江送暖兼送加薪喜訊
二千幾年前，耶穌基督出世嗰陣，有三個來自東方嘅博士向耶穌送上黃金、乳香同沒藥。身為基督徒嘅新鴻基地產副主席兼董事總經理郭炳江，尋日同馬灣公園諮詢委員會主席鄭慕智、馬會大董李家祥一齊粉墨登場扮博士，中文大學校長沈祖堯就扮牧羊人，齊齊為「全城更新」喺馬灣公園挪亞方舟舉行嘅「喜悅之聖誕2010全城愛無限」送暖活動演出聖誕劇，仲為十八區近七百名基層兒童同屋企人送上食物禮品包。
會係十年嚟最好
基督徒樂於將愛同別人分享，對於自己嘅員工，郭炳江更加關懷。今年通脹數字驚人，所以郭炳江呢位「東方博士」尋日為班好伙記送上喜訊。佢話今年新地員工一定有人工加，仲一定好過舊年，會係十年嚟最好嘅一次；咁都唔止，花紅仲一定多過舊年，雖然仲未落實幾多，大約會多過舊年廿幾個巴仙，真係聽見都興奮！郭炳江送咁厚禮，但大家唔使為回禮而傷腦筋，事關郭炳江話佢準備緊收禮物，但淨係等緊收老婆大人嗰份啫。佢仲好有信心話，老婆應該會知道佢想要咩嘢禮物，郭氏伉儷認真夠晒sweet同默契。
除咗聖誕劇，「全城更新」主席馬時亨太太馬王培琪仲搵咗老友保安局局長李少光太太嚟獻唱。李太除咗係稱職嘅賢內助，仲做好多老人侍奉工作，但估唔到佢嘅歌聲拍得住唔少歌星，聽到馬太話以後有活動要多啲搵李太嚟表演。馬太雖然無表演，但做咗大總管，負責買食物禮品包，佢話入面有米、有罐頭有臘腸，相當實用，希望收到嘅朋友都會喜歡。
卓妮