中環出更：博愛餐舞會賓客邊玩邊籌款

當晚曾浩輝嘅表演未演出先轟動，佢仲特登着咗件踢死兔，顯得官仔骨骨。卓妮記得佢曾經喺一個場合同鋼琴王子李雲迪攞簽名，事關佢視李雲迪為偶像。當晚卓妮終於見識佢嘅演奏水準，一曲《Think Of Me》贏得全場掌聲。

白韞六難得同太太拍拖獻唱《All I Ask Of You》，兩人深情對唱，甜蜜感染到台下。除咗高官施展渾身解數之外，博愛醫院一眾領導層都瞓身演出，娛人娛己不遺餘力。好似有「博愛Eason」稱號嘅候任主席湯修齊，經常喺博愛嘅活動上演出助興，卓妮早已風聞佢身懷絕技。呢晚佢搞搞新意思，同八歲囝囝拍住上，兩仔爺唱到興起仲走落台下同賓客握手添，好有大明星嘅風範。

黃帆風同太太唱得太投入，外孫仔上台獻花幾次都失敗而回。 （麥潤田攝）

湯修齊同囝囝合唱《如果我是陳奕迅》，仲走到台下同賓客握手。

黃帆風夫婦獻唱 「忽略」孫仔

要數全場最溫馨嘅節目，梗係首推博愛主席黃帆風夫婦獻唱啦！當晚黃主席同太太真情對唱《美麗的西班牙女郎》，兩人唱得好投入，現場掌聲不斷。但中途有插曲，黃主席嘅寶貝外孫仔被媽咪擺上舞台，原本諗住獻花畀公公、婆婆，點知黃主席夫婦唱得太專注，根本睇唔到人仔細細嘅BB仔喺腳邊做乜，於是BB仔一時喺台上遊蕩，一時又去腳邊獻花，如是者幾個回合，逗得台下賓客開懷大笑。

胡定旭（右）突然抽出一千元畀前立法局議員張人龍嘅兒子、博愛醫院副主席張德貴，原來係還去年此時借嚟買獎券嘅舊債。 （溫國佳攝）	靚女為曾浩輝整理好衣領，然後兩人上台合作演繹《Think Of Me》，引爆全場高潮。	放大圖片

咁精彩嘅溫馨名人騷，難怪連醫管局主席胡定旭都玩得盡興，撐到散場。

卓妮