中環出更：名人撐愛駒惜不敵過江龍
被視為馬壇盛事嘅國泰航空香港國際賽事，尋日喺沙田馬場上演，吸引城中名人入場觀戰。當中四場係國際賽，獎金極之和味，立法會議員林大輝派「極奇妙」落場比併，仁愛堂前主席史立德就捧愛駒「好先生」上陣，可惜「本地薑」不敵「過江龍」，今次賽事無緣捧盃嘞。
徐立之戴牛仔帽湊熱鬧
揚威國際賽，係唔少馬主嘅心願，「好先生」戰績彪炳，史立德一於拉埋廣東社團總會主席王國強（KK）齊入場打氣。KK更落注買「好先生」贏。林大輝愛駒就出戰另一場國際賽，佢睇嚟信心十足，拉埋太太做啦啦隊。可惜過江比併嘅名駒表現超班，兩駒均不敵對手，與三甲無緣。
觀戰賓客中，仲有港大校長徐立之。大會搞氣氛，向入場男士大派白色牛仔帽，徐校長都攞番一頂湊熱鬧，但佢笑言無意做Cowboy，擔心騎馬要經過特別訓練，太辛苦，寧願行山舒服啲。
聖誕節臨近，佢打算返多倫多過白色聖誕。梗係喇，徐校長喺當地醫院同大學工作多年，嗰度已成為佢第二個家，趁假期見吓老友，都算長情囉。