中環出更：受勳宴好友賭王談笑風生
病愈復出嘅賭王何鴻燊，近日再度活躍，繼日前現身螢幕呼籲市民捐錢支持東華籌款，尋晚以主人家身份，喺酒店宴請城中富豪老友食晚飯，賀佢攞大紫荊勳章。一向愛熱鬧嘅燊哥認得晒所有賓客，更逐一抱抱同傾偈。呢餐豪門夜宴，絕對係燊哥強勢回歸社交圈嘅頭炮作。
二房子女陪同
啱啱慶祝完八十九歲大壽嘅燊哥，話咁快又搞party，尋晚喺文華東方酒店包廳，請嚟新世界主席鄭裕彤及公子鄭家純、合和主席胡應湘、卓能集團主席趙世曾及千金趙式芝、利孝和夫人，以及前民政事務局常秘媽打李麗娟等，粒粒巨星。
燊哥夜晚七點喺淺水灣大宅出發，心口掛住大紫荊勳章好搶眼，由二房子女包括超鳳及保鏢陪同下抵達酒店。人逢喜事，面色睇落紅潤有光，精神奕奕。燊哥見番咁多老友，顯得好雀躍，喺晚宴上致辭多謝大家，中氣十足，回復昔日談笑風生嘅風采。晚宴高潮，燊哥更攞起酒杯祝酒，但就無飲酒。與燊哥相識幾十載嘅趙世曾送上鮮花，逗留一小時後離開。兩人年幾冇見，到底傾乜？趙世曾笑騎騎話：「佢（何鴻燊）成日話我有一千個女友喇。」睇嚟燊哥依然好生鬼。眾人歡聚到九時四十五分左右散席，廿多個保鏢護送燊哥回家休息。
四太另有重任
晚宴上未見四太梁安琪，不過佢另有重任，下午現身沙田馬場，為燊哥愛駒「爆冷」出戰國際賽打氣，仲帶埋囡囡超欣。「爆冷」最後三甲不入，四太仍保持笑容，輸贏對四太嚟講，只係平常事。四太睇樓市調整一樣咁淡定，佢話手上揸住嘅豪宅係長線投資，政府出招壓制炒風，對佢冇乜影響喎。
卓妮