政情：唐唐輕佻自取其辱
政務司司長唐英年（唐唐）講嘢輕佻已經唔係新聞，好似兩年前佢出席立法會內務委員會特別會議時，形容因漢普頓酒店被查封而流落街頭嘅遊客喺度「條條fing」，畀人鬧到依家都言猶在耳。以為唐唐應該會吸取教訓喇，可惜江山易改、本性難易，尋日喺另一次內會特別會議上，佢又好似飲大咗咁，不停人身攻擊多位泛民議員，搞到建制派嘅匯賢智庫主席葉劉淑儀都睇唔過眼，一盤冷水潑埋去，寸爆唐唐「幽默功夫唔到家」，仲話聽佢講嘢嘥自己時間添！
唐唐定期出席內會，同眾議員討論政府政策，尋日佢就揀咗人口政策呢個題目，因為人口老化同內地女性來港產子，都對本港人口結構有重要影響，所以檢討政策前要諮詢立法會意見。不過唐唐把口就話聽意見，但只要有人講嘢唔啱聽，佢就寸爆議員，部分更加涉及人身攻擊，輕佻至極。
好似民協馮檢基批評，港人同內地人結婚，如果老婆係香港人，生仔可以畀津貼價，但一旦老公係香港人，老婆生仔就要畀成本價三萬九千蚊，等同歧視男人，要求一視同仁。點知唐唐死口唔認之餘，仲話：「我哋唔歧視男人，如果阿基你識生仔都可以收平價。」完全夾硬嚟！有公民黨議員炮轟當局懶理空氣質素，搞到唔少人移民為求一口新鮮空氣，點知唐唐唔受批評之餘，仲好輕佻咁話：「你生得高，先睇唔到空氣污染有所改善嘅數據。」同人身攻擊無乜分別。
被寸學歷「水皮」
眼見唐唐視議員意見如無物，曾經與佢有同袍之義嘅葉劉亦睇唔過眼，以其人之道還治其人之身，會後直斥聽唐唐「喺度廢噏」、「嘥人時間」，又質疑唐唐做咗官七年咁耐，講嘢都咁生硬，話相信同佢半途出家有關喎。
葉劉仲話諗唔明唐唐咁嘅態度點解仲要嚟開會：「佢可能想窒人，又或者想表現幽默感，但功夫完全唔到家！」
葉劉愈講愈嬲，連唐唐嘅學歷都拎埋出嚟做炮灰。佢話唐唐乃富家子弟出身，親戚又捐過唔少錢畀美國名牌大學，無理由連長春藤盟校、即係由哈佛及耶魯等八大名校組成嘅校網都入唔到。如果唔係唐唐自己不屑，就一定係「水皮」咁話喎。葉劉呢巴摑得咁應，唔知可唔可以令唐唐第日收斂啲呢？