醫學會會長蔡堅：「套餐式收費，將保險業計算風險成本嘅責任推畀私家醫生，要醫生包醫、包底，將貨就價，簡直戇居！」
保險業界立法會議員陳健波：「保險業界其實憂多於喜，驚自願醫保推出後，會流失一批帶來利潤嘅客，反而吸引咗好多高風險嘅人來買！」
「一零憲章」會員錢偉洛：「打工仔供完一去冇回頭嘅強積金之後，六十五歲後仲要供醫保？係咪要市民死之前仲供緊錢畀政府？政府係咪同寶藥黨結盟？」
病人互助組織聯盟外務副主席張德喜：「長期病患者冇經濟能力，保費原價都買唔起，何況係三倍保費？癌症、腎病、心臟病、精神病等危疾，更加一定走唔甩醫管局！」
公立醫院心臟醫生協會代表劉育港：「政府應該加資源畀醫管局，唔係倒轉來用公帑補貼病人去睇私家！唔通驚私家醫生搵錢唔夠多？」
關懷香港組織幹事李嘉豪：「五百億公帑只資助有錢買保險嘅人，長者同長期病患者要畀三倍的保費，擺明車馬唔保佢哋！」
香港哮喘會義務秘書陳永佳：「長期病患者最需要門診，偏偏醫保就唔包！強積金搞到人人都受害，好質疑政府仲點監管保險公司！」
深水埗社區協會總幹事劉卓奇：「要六十五歲以上的長者每月供一千二百五十蚊醫保？仲多過生果金！周一嶽試吓落區聽吓公公婆婆的意見，睇吓出唔出到條邨？」