政情：劉健儀公民黨口供矛盾
自由黨正值多事之秋，田北辰退黨，搞到胞兄田北俊要全面復出；「哪吒」方國珊退黨，就令「姐姐」主席劉健儀（Miriam）大叫痛心。
講到當哪吒係妹妹嘅Miriam前晚出席田少喺港島山頂大宅嘅ＢＢＱ聚會時，喺黨友面前再度提及哪吒離巢一事，繼續傷感，據聞仲講到眼濕濕添。
田少近年每年都喺山頂大宅招待一眾核心黨友，今年撞啱發生連串退黨風波，ＢＢＱ聚會變英雄宴，順便凝聚軍心，開開心心玩番晚。哪吒退黨，係自由黨最新熱話，Miriam尋晚同黨友講起呢位「妹妹」出走，仍然傷感，仲話幾個月前公民黨一名立法會議員本來部署明年區議會選舉出選「日出康城」嗰區，硬撼哪吒，最後佢幫哪吒擺平勸退敵人，點知哪吒轉頭申請退黨。
不過，該議員尋日接受查詢時，就否認同劉健儀及任何自由黨人商量過區選協調，指曾經因租賃日出康城嘅社區會堂接見區民，因而令哪吒以為受威脅，但佢強調從未諗過出選「日出康城」，劉健儀亦無為此接觸過佢。咁點解兩人講嘅版本有出入嘅？