政情：2L變導賞員帶隊遊立會
立法會議員有時會義務帶公眾人士遊覽立法會大樓，尋日經濟動力嘅「2L」梁君彥（Andrew）同林健鋒（Jeffrey）就做咗義務「導賞員」，不過佢哋帶嘅團只有七人，仲係早前誕生嘅其中四位「香港精神大使」，同埋作為活動發起人嘅香港青聯主席陳仲尼（Rock）同Andrew嘅囝囝梁宏正，再加多位Jeffrey嘅囝囝林凱章。
宴請精神大使
三位名人二代，包括製衣大王陳元鉅兒子阿Rock、華人置業董事劉鳴煒同Andrew嘅囝囝梁宏正，早前發起「香港精神大使」運動，七位大使順利誕生，作為父輩嘅Andrew同Jeffrey唔止精神上支持，尋日仲掏荷包喺中環宴請幾位精神大使，阿Rock、梁宏正同林凱章都有赴宴。
兩位世叔伯撐後輩，上下半場都交足貨。Andrew話，食完午飯，橫豎咁近立法會，於是帶幾位精神大使參觀立法會大樓，當係飯後「甜品」，幫助消化囉。Andrew同Jeffrey請食飯之餘，仲兼職做埋導賞員，呢份心意幾位後輩應該好受落。