中環出更：丁毓珠試外套嫌花巧無斬獲
東區區議會主席丁毓珠尋日率領多名區議員與立法會議員會面及午膳，佢見飯後有空檔，於是獨個兒過去太子大廈間法國名牌Leonard睇衫。
珠姐揀咗件有色彩鮮艷印花圖案嘅外套着上身，眼見鏡中花枝招展嘅自己，應該鍾意到即時扑錘包起件衫，但珠姐最後都無買到。
睇吓有無減價貨
卓妮見珠姐着起件外套都幾好睇，相當搶眼，但佢好快就除低，着番自己件灰色行政人員外套離開。睇衫被卓妮碰個正着，珠姐就話只係行過睇吓有無減價貨，遇到平嘢就入貨，順便幫啲朋友睇吓有無嘢執喎！至於點解件外套睇唔啱，珠姐就話嫌件外套花巧得滯，接受唔到，始終都係鍾意着番啲深色外套，覺得啱自己Style多啲。
不過，珠姐忽然突破自己嘅格調，嘗試接受花巧嘅新衫，莫非發生咗啲開心事？卓妮最近喺政圈中聽聞，珠姐識咗一位知心好友，所以心情特別靚，珠姐急忙澄清話：「我七十幾歲人，唔好立亂聽人講啦……我本身好多嘢做，好忙㗎！」
珠姐話，佢擔任永遠會長嘅東區文藝協進會管理嘅東區兒童合唱團，將於平安夜晚喺西灣河文娛中心表演，之後又要帶小朋友參觀維園工展會，三十日晚又要出席東區婦女會五十五周年慶典，所以真係好忙。珠姐本身係維多利亞教育機構校監，而且又係東區委任區議員，到明年底已做咗十二年區議會主席，估計未必再獲政府委任，相信到時會有更多時間享受人生。
講番佢試衫嘅Leonard，係極高檔嘅時裝品牌，一條裙子動輒五位數字，色彩斑斕嘅大花圖案係呢個牌子嘅風格，着得人特別苗條，不過鍾唔鍾意呢種風格，就見仁見智嘞。
卓妮