政情：鬍鬚曾雕琢不成器
唔少政界人物近年都興起寫網誌，好似煲呔曾、財政司司長曾俊華同民政事務局局長曾德成咁，佢幾位周不時會喺網誌發表文章，除咗抒發感受外，佢哋嘅網誌仲經常會透露一啲施政理念同玄機。鬍鬚曾曾俊華尋日喺網誌度講到「量材就質」，睇嚟佢反省到自己嘅材同質；同埋既然話「量材就質」，依家庫房水浸，佢反而拒絕喺預算案放水紓困，擺明自打嘴巴喇！
鬍鬚曾尋日喺網誌話，今次驟眼睇以為只係講吓電子動態版《清明上河圖》同台灣故宮博物院嘅鎮館之寶《翠玉白菜》有幾犀利有幾難得，不過睇真啲，鬍鬚曾篇網誌其實有弦外之音。
篇網誌話，睇住電子動態版《清明上河圖》，可以感受到乜嘢叫做「敢想、敢幹」，一般人其實不時都會忽發奇想，但付諸實行嘅其實少之又少，圖內人物識行識走嘅《清明上河圖》好難能可貴咁話。
鬍鬚曾話鋒一轉，話自己八月底曾經訪問台灣，當時喺故宮博物院欣賞咗《翠玉白菜》。佢讚藝術家巧妙咁利用塊原材料顏色唔一致嘅特點，將佢雕成渾然天成嘅白菜同蚱蜢，實踐咗「量材就質」嘅特點喎。
做守財奴 年年估錯數
其實仲有唔夠三個月，新一份財政預算案就會出台，香港經濟氣氛波譎雲詭，鬍鬚曾照計應該好唔得閒，但突然咁有興致寫藝術品，到底咩意思呢？唔知大家記唔記得，鬍鬚曾前一排喺立法會財經事務委員會上面，開到口話自己無力抗通脹，兼且未必再派糖紓困。嘩，呢啲咁創新嘅政策同施政理念真係唔係人人講得出口，坐擁超大量嘅儲備都唔紓困，真係應晒「敢想、敢幹」嘅特點。其實庫房大把盈餘，佢識得好好利用，就係體驗到量材就質，唔好再做「守財奴」喇。
除咗預告自己嚟緊嘅財政預算案無料到之外，鬍鬚曾仲藉藝術品自侃添。鬍鬚曾做咗多年嘅局長以至司長，都完全顯露唔到佢有政治天分嘅一面，佢做財爺，看住政府盤數又做「守財奴」，仲年年都估錯數，以佢嘅材料，無論交畀邊位大師雕琢、扶掖，就算神乎其技，無論如何「量材就質」，無論花幾多時間，佢都完全唔會係會雕琢成《翠玉白菜》嘅材料，鬍鬚曾應該有自知之明，先至有感而發啩。