中環出更：瞓身網遊項明生有諗頭
打機打得叻都係一種超卓嘅生活品味，Sony PlayStation總經理兼旅遊作家項明生（James）對此最有感受。不過，今時今日嘅後生仔多數喺社交網站遊蕩，所以負責市場推廣嘅James一於瞓身落場玩，年初建立咗個人嘅facebook，又玩微博以接觸內地後生仔。最近佢炮製嘅網上短片廣告，就喺網上爆紅，仲獲得有廣告界奧斯卡之稱嘅金帆獎。
James話畀卓妮聽，佢早前去中學演講，啲學生哥話畀佢聽：「冇facebook就冇face」，佢受益良多，所以佢話廣告短片一定要搞鬼，唔可以再用傳統廣告思維。最近佢哋食正喺內地爆紅嘅真人版「三輪哥」條水，推出一套「港版三輪哥」網上短片，迅極喺年輕網民之間傳播開來，上個月尾仲攞咗金帆獎添！其實佢哋係宣傳新遊戲「功夫滑仔」。
尋日James現身第九屆亞洲遊戲展宣傳活動，事關Sony係最大參展商，今年佢邀請內地鍾意打機嘅宅男宅女來港同本港電車男女同場打機，睇吓可唔可以撮合中港情緣。
卓妮