中環出更：小琳賀壽交心明明姐勁冧
「美容教主」鄭明明上月廿八日喺上海開party慶祝生日，到賀逾百人包括「中國女電王」李小琳，佢好有心思，送上一束巨型黃玫瑰及暖笠笠羊絨晨褸，令壽星女甜在心頭。
派對喺上海一個國際舞會所舉行，迷上拉丁舞嘅明明姐原來同小琳經常喺度練舞，但開party就係首次，當日賓客仲有息影多年嘅女星葉楓。
明明姐差啲感動到想喊，梗係喇，成班好姊妹包括謝寧、羅琳、翁虹等坐飛機去上海唱生日歌畀佢聽，開餅店嘅謝寧仲拎咗四十幾盒曲奇賀壽，認真唔話得。
李小琳本來被邀請為派對做開舞嘉賓，可惜佢近排太忙，冇時間練舞。佢預告明年三月人大政協會議期間，將夥拍明明姐喺晚宴上跳拉丁舞，請咗拉丁舞后黃蕊幫佢編舞添。
今年生日，明明姐分外感觸，事關被濕疹折騰一年，令佢明白家人同健康先係人生無價寶。牛一當日，佢叫老公唔使破費送禮：「老公陪我風雨同路咁多年，有佢已經足夠。」真係sweet。
卓妮