政情：劉夢熊壯志 問鼎諾貝爾
全國政協委員劉夢熊近日因為替「結石寶寶之父」趙連海出頭而聲名大噪，佢尋日接受電台節目訪問時，承認事後曾經收到朋友嘅勸喻，叫佢「到此為止」，雖然係咁，但佢本住「人無壓力輕飄飄、泰山壓頂不彎腰」嘅宗旨，堅決唔肯放棄。佢亦明白，朋友勸佢只係出於職責所在，老婆亦都有叫佢唔好咁激，因為「阿爺唔得罪得」。
劉夢熊喺節目中強調，作為全國政協委員，自己有責任做番啲嘢，因為全國政協委員嘅身份既係一項榮譽，亦係一項責任。佢仲提到，自己當年一條泳褲闖香江，將來希望可以出一本傳記體小說，問鼎諾貝爾文學獎。真係有志氣！
除咗趙連海外，佢仲講到香港申辦亞運，同下屆特首嘅條件。劉夢熊認為，香港以現時嘅人力物力財力，根本唔可以辦到一個可以同今屆廣州亞運相提並論嘅亞運，所以獻醜不如藏拙，應該將精力放喺解決民生問題上，第時有閒錢先再諗啦。