政情：直資校炸彈孫公拆唔掂

教育局局長孫明揚日前就直資學校混帳事件出席立法會聆訊時，自稱「冇牙力」對付啲違規學校。不過教育界立法會議員張文光尋日喺電台反駁，指年前英基及臻美學校先後爆出醜聞，一樣好抗拒政府介入，但當局一威脅停止撥款同直接派員進駐校董會，兩間學校立即投降。佢認為孫公唔係冇牙力，而係因為違規直資學校真係太多太亂太惡搞，即使孫公係出名嘅拆彈專家，都冇咁快可以一次過拆晒呢堆計時炸彈喎。