中環出更：蔡志明：熱錢可轉炒商舖

協助愛滋遺孤嘅「智行基金會」前晚舉行慈善晚宴，「智行」慈善大使徐子淇請嚟城中名人撐場，場面星光熠熠。

投資樓市屢有斬獲嘅蔡志明同太太盛裝到賀，講起政府呢次出招係咪打殘炒家，蔡生就唔太同意，佢話市場熱錢仍然多，有實力嘅投資者會識得轉炒商舖，佢冇透露自己近日有否入市掃舖，不過醒目嘅人一聽就知，只要眼光夠準，地產市道仍有發達機會，睇你識唔識得轉膊嘞。

周國豐（右）話媽咪放售嘅富豪海灣豪宅仍不乏買家問津。

曾智雄牽頭成立珠三角委員會，抓緊中國發展機遇。

周國豐睇好後市等掃貨

周啟邦公子周國豐（Brandon）都話睇好後市，媽咪放售嘅富豪海灣豪宅近日遇上買家醞釀撻訂三百多萬元，引起市場關注，Brandon就話未驚過，佢話唔少投資者一聽見有人想撻訂，不停打電話嚟問價，睇嚟間屋唔憂賣，媽咪一毫子都唔會減。Brandon自己亦有投資物業，早前購入西半山新盤臻環五百多呎單位，且一炮過付款。咁有「食力」，難怪佢話唔驚樓市調整，若然樓市回落百分之十，佢會加碼掃貨都未定喎。

同場仲有前全國青聯副主席曾智雄，佢預告中華總商會嚟緊將成立珠三角委員會，由佢擔任主席，頭炮係十二月七日北上廣州拜會重要官員，順便宣布委員會成立喎。