政情：怪醫診所睇風水催運

記得怪醫講過無諗過要升空做「星球」或者「月球」醫生，仲話擔心維唔到皮，不過依家可以唔使咁驚，事關診所雖然只係開咗一星期，不過家騏醫生話已經發咗巿，相信為怪醫打咗支強心針。

怪醫第一次開診所，做咗私家醫生多年嘅哥哥家麒就晒佢，除咗醫生房畀怪醫揀先之外，連裝修都畀怪醫話事。

怪醫仲搵人上門睇風水，話兩間房都好好，佢嗰間就旺人緣，怪不得醫管局主席胡定旭、新任醫管局CEO梁栢賢、食物及衞生局正副局長、醫學會會長蔡堅和副會長陳以誠等醫學界重量級人物都抽空出席，連匯賢智庫議員葉劉淑儀、商務及經濟發展局副局長蘇錦樑、運輸及房屋局副局長邱誠武等都有賀佢。除咗高官，怪醫唔少師弟都有嚟，仲大讚怪醫有義氣，除咗成日大方請食飯，又好肯畀師弟妹上位，人緣咁好，怪醫真係無坐錯房。