政情：李明逵難忘大館演習
警隊前一哥李明逵退咗休都有一段時間，但一提起佢服務多年嘅警隊，總是充滿感情，就好似最近佢為香港文化旅遊博覽嘅《古蹟串串貢》小冊子撰文，就透露咗唔少趣事。
話說佢當差無耐，就畀人調咗去俗稱「大館」嘅舊中區警署做CID主管，雖然守嘅日子唔長，但佢至今仍記得「大館」周圍都見到嘅紅色數字標記，究竟係乜？原來當年警民關係唔係幾好，市民衝擊衙門唔係新鮮事，所以警署要定期做防衞演習，每次聽到大館署長敲起銅鑼，手足就衝去槍房擸架生，然後去番劃上紅色數字標記嘅守衞點戒備，認真刺激！
除咗李明逵，本小冊子仲搵咗兩位本港名導演杜琪峯同張婉婷講吓心水古蹟。拍咗唔少PTU（機動部隊）故事嘅杜琪峯都係講警署，不過佢講嘅係油蔴地警署，話嗰度咁多年都無變過，長走廊、木地板、鐵窗框同壁爐，驚嘆當年嘅建築好有特色。
張婉婷最難忘係自己嘅母校香港大學。佢當年喺港大取景拍攝《玻璃之城》，令佢諗番起唔少讀書時代嘅情景，好似喺陸佑堂考試同跳「穀倉舞」（Barn Dance），就充分反映港大學生嘅本色——Work Hard ，Play Hard！