中環出更：陳詠梅「捨」高職「得」自由
做公務員做到助理處長，年薪過百萬，好多人都唔捨得份人工，但凡事總有例外。好似廉政專員湯顯明（甜湯）位紅顏知己、入境處助理處長陳詠梅（Helen），今個月一日就告別官場，提早三年退休，認真「捨得」！
難怪寫得一手好書法嘅Helen，即席揮毫嗰陣亦題咗「捨得」兩個大字，佢話做人要有捨先有得，咁捨得啲乜？又得到啲乜？Helen無特別提前者，但就話可以「得番」啲時間去練書法、畫國畫，當然仲有佢近年熱愛嘅古琴，真係廿四個鐘頭都唔夠用咁話。
除咗熱愛中國文化，Helen亦都好鍾意聽佛偈，事緣有次去一個禪修營，聽一行禪師講道，機緣巧合下更報讀咗一個佛學碩士課程，明年六月就畢業，佢話會趁呢段時間去做義工。
咁佢同甜湯傳得熱烘烘嘅戀情，又幾時開花結果呢？怕羞嘅Helen好嗲咁話：「都知你哋會問，一早咪話咗唔講呢啲嘢囉！」真係我見猶憐，唔怪得甜湯甜上加甜。其實，Helen真係有捨有得，仲得番啲時間拍拖，認真甜蜜蜜！
講番入境處工作，原來當年喺港大主修化學嘅Helen本想去外國做研究，咁啱有朋友叫佢投考入境處，咁咪報名囉，結果一做廿八年，最難忘係九六年去海外，游說各國給予特區護照免簽證待遇，之後，佢曾參與智能身份證以及e道等開發工作，難怪佢自嘲話：「我天生係開荒牛！」
退休就業 拒封後路
至於退休後會唔會繼續做嘢，Helen就話：「我讀書嗰陣話以後唔再寫程式，點知依家都係要做資訊科技，所以做人Never Say Never，緣分嘅嘢，有時係整定！」大家不妨慢慢咀嚼。
卓妮