中環出更：炳江扑頭 郭老太帶隊撐場
公開大學尋日頒授榮譽博士學位畀四位傑出社會人士，包括新鴻基地產副主席郭炳江、曾任港交所行政總裁嘅數碼港管理公司主席周文耀、著名導演許鞍華同順德聯誼總會榮譽會長胡永輝。
前嚟撐場嘅猛人多不勝數，但以郭老太鄺肖卿親自率領嘅打氣團最有氣勢，郭老太仲同二仔郭炳江、細仔郭炳聯高調畀記者影靚相，「鐵三角」陣容搶晒鏡。
媽咪壽禮 老婆發辦
郭炳江獲頒榮譽工商管理博士學位，精神奕奕嘅郭老太尋日心情勁靚，有求必應，叫佢擺唔同姿勢影相，佢都好合作。郭炳江仲自爆話，媽媽就嚟過生日，全家人會食飯慶祝。咁大佬郭炳湘會唔會出現呀？公關立即擋駕。咁佢打算送咩禮物畀媽媽？郭炳江就碌大隻眼，表情好趣怪，諗咗五秒鐘先至緩緩吐出幾個字：「呢啲嘢係老婆諗嘅！」郭老太乜都有，要送咩畀佢至有驚喜呢？呢個任務真係難過賣樓。尋日郭炳江太太冇嚟到，唔知係咪打點緊郭老太嘅生日安排呢？
尋日現身撐場嘅一眾新地高層，包括執董陳啟銘、陳鉅源、鄺準、黃植榮同陳國威。當中以鄺準最引人注目，事關佢唔止係集團元老級人物，又係郭老太嘅細佬、郭炳江幾兄弟嘅舅父，但佢為人低調，尋日無喺鏡頭前現身。
教育局局長孫明揚太太就嚟撐胡永輝，佢哋識咗廿幾年。胡會長話畀卓妮知，上世紀八十年代初佢擔任保良局主席時，孫公咁啱做民政事務，兩家人從此結緣。後來大家傾起至知淵源更深，原來胡會長嘅細妹做過孫太學生，當年孫太喺中學教物理。咁深交情，難怪孫太尋日特別去賀喜。
卓妮