政情：黃宜弘發燒聆訊中途離席
立法會政府帳目委員會尋日下午就轟動全城嘅直資學校「混帳」醜聞，展開第二場公開聆訊，官員同議員唇槍舌劍，會議開咗一個鐘頭，委員會主席「IQ博士」黃宜弘突然腰斬會議，嗌休會十五分鐘，好多議員都即場打咗個突，唔知發生乜嘢事。
帳委會第一次聆訊開會三小時，開咗兩個鐘頭先至有小休。尋日開會四粒鐘，第一個鐘頭IQ博士就嗌休會，梗係有唔妥啦。果然，十五分鐘過後，官員、議員歸位，唯獨唔見咗IQ博士，只知佢話身體唔舒服，要中途離場，改由另一位議員主持會議，究竟IQ博士身體出現乜嘢大事呢？
到夜晚，我哋終於聯絡上IQ博士，原來佢前幾日食飯「杉」魚骨入牙肉，一直無留意，傷口發炎引致發燒，尋日開開吓會，突然成個人覺得好凍兼頭痛，於是走去睇醫生，醫生幫佢拔番條魚骨出嚟，又開咗退燒藥畀佢，應該好快無事。