中環出更：四太買朱古力賀賭王受勳
康復神速嘅澳門賭王何鴻燊，日前現身攞大紫荊勳章，面色紅潤教人眼前一亮。燊哥暫時未可以復出社交圈，但胃口超好，尤其鍾意食甜品。四太梁安琪最知燊哥心意，早前趁授勳典禮之後撲去中環買See's CANDIES朱古力，氹燊哥開心。
燊哥攞大紫荊，何家上下好雀躍，四太除咗陪伴燊哥出席攞獎，更製造小驚喜。授勳儀式結束後，卓妮喺中環置地廣場撞見四太同保鏢逛See's CANDIES，一嚟就掃咗兩罐杏仁香脆朱古力，每罐盛惠三百九十八元。
四太話，早前試食過後覺得入口香脆，加上製法健康，不含色素及防腐劑，一於分甘同味，買盒返去同燊哥撐吓枱腳。
燊哥一向係甜品專家，特別鍾情COVA嘅杧果蛋糕，聽講朱古力都係佢「飛佛」。除咗對燊哥體貼，四太對燊哥胞姐八姑娘何婉鴻一樣係咁照顧周到。
四太知道八姑娘都係美國品牌See's CANDIES擁躉，買完朱古力後，拿拿臨將其中一罐攞去孝敬正喺FENDI購物嘅八姑娘。
八姑娘狂掃冬裝
原來正當四太喺See's CANDIES買朱古力嘅時候，八姑娘喺幾名助手陪同下，正血拼置地間FENDI，喺短短一粒鐘狂掃五大袋冬裝，據聞大部分都係冬天大褸，FENDI嘅大褸每件都係數以萬計，八姑娘咁掃法，真係唔講得笑。
店舖對呢位超級VIP好重視，派出兩位店員幫八姑娘拎嘢，助手就細心攙扶佢上車，排場十足王太后出巡，相當有面子！
卓妮