政情:陳裕光畀自己100分!

大家樂經歷扣飯鐘錢一役,公眾形象插水,領航人集團主席陳裕光成眾矢之的。尋日大家樂自風波後首次公布業績,有記者叫陳裕光為自己擔任臨時最低工資委員會委員嘅表現評分,佢自抬身價話值一百分。「做足一百分」只係大家樂嘅宣傳口號,陳裕光竟然乘機賣廣告。

陳裕光承認,喺扣飯鐘錢上,自己政治智慧不足,當大家樂係茶餐廳咁經營,意識唔到公眾對大家樂期望咁高,「有帶頭作用」;佢又話諗住自己快退休,公司業務已經交晒畀管理層打理。陳裕光政治智慧不足,但詭辯一流,變相將今次風波嘅責任推畀下屬,仲兜個圈將大家樂捧到好似行內龍頭咁款,似乎係自抬身價囉!

大家叫佢為自己評分,陳裕光面不改容話,自己喺臨資會嘅工作表現值一百分,但外界喺扣飯鐘錢事件上對佢嘅評價,同佢喺臨資會嘅投入程度唔成正比,覺得有啲委屈。佢唔肯正面回應會否繼續做委員,只係話自己一把年紀,唔適合做粗重工夫喎,似乎話中有話。

Money18新功能「18好路數」為你預測心水股票升跌機會率