政情：季詩傑退黨望息干戈
今年絕對係政黨嘅「內訌之年」。白鴿黨與少壯派分家、富貴黨地震，就連社民連嘅內部批鬥亦沒完沒了。「維園阿哥」任亮憲早前有傳喺前黨主席黃毓民支持下發起倒閣行動，雖然最終倒閣失敗，但黨內紛爭並無停過，網上罵戰更愈來愈狠。早前已辭去秘書長一職嘅行委季詩傑，尋日突然宣布退黨，話希望可以藉此化解黨內怨氣。
被鬧帶阿陶去「跳舞」
社民連主席陶君行雖然喺倒閣事件後，表明希望黨員唔好再喺網上挑起無謂罵戰，但前黨主席黃毓民日前就喺網台再向季詩傑發炮，內容包括鬧佢曾帶阿陶到新花都夜總會「跳舞」之類。唔知呢番嚴厲指控係咪阿季退黨嘅導火線，但有行委就透露，面對「倒閣派」黨員不斷喺網上無休止嘅謾罵，阿季難免感到心灰意冷，退黨並唔奇。
阿季喺退黨信形容，依家社民連就好似一個「對人不對事嘅自毀組織」，如果黨內紛爭由佢「口多」引起，佢願意退黨化解矛盾。由於阿季嘅請辭要行委會通過，最後有冇人成功挽留佢，依然係未知之數。